TV NEWS channel: ಹೇಮಂತ್ ರಾಜ್ (ಯುದ್ಧಭೂಮಿ ಹೋರಾಟಗಾರ ಸಮಿತಿ ಅಧ್ಯಕ್ಷ):

“ಸರ್ ಕಂದಾಯ ಇಲಾಖೆಯಲ್ಲಿ ಬಹಳಷ್ಟು ಜನ ಭ್ರಷ್ಟರಿದ್ದಾರೆ, ಅದರಲ್ಲಿ ಅನೇಕರು ಒಳ್ಳೆಯ ಅಧಿಕಾರಿಗಳು ಇದ್ದಾರೆ ಇಲ್ಲ ಅಂತ ಅಲ್ಲ. ಇವತ್ತು ನೋಡಿ ಒಳ್ಳೆಯ ಅಧಿಕಾರಿಗಳು ಇದ್ದಾರೆ ಅಂತ ನಾನು ಯಾಕೆ ಹೇಳ್ತಾ ಇದ್ದೀನಿ ಅಂದರೆ, ಒಳ್ಳೆಯ ಅಧಿಕಾರಿ ಇದ್ದಿದ್ದಕ್ಕೋಸ್ಕರ ಈ ಜಾಗ ರಕ್ಷಣೆಯಾಗಿದೆ. ಕಳೆದ ಸಿದ್ದರಾಮಯ್ಯ ಸರ್ಕಾರದಲ್ಲಿ ಡಿಸಿ ಶಂಕರ್ ಅಂತ ಹೇಳಿ ಜಿಲ್ಲಾಧಿಕಾರಿಗಳು ಇದ್ದರು. ಅವರು ಸಾವಿರಾರು ಎಕರೆ ಜಾಗ, ಸುಮಾರು 16 ವರೆ ಸಾವಿರ ಎಕರೆ ಜಾಗವನ್ನು, ಅಂದರೆ ಸರ್ಕಾರಿ ಜಾಗಗಳನ್ನು ಯಾರು ಒತ್ತುವರಿಯಿಂದ ಒತ್ತುವರಿ ಮಾಡಿದ್ದರೋ, ನಕಲಿ ಕಂದಾಯ ದಾಖಲೆಗಳನ್ನು ಯಾರು ಮಾಡಿಕೊಂಡಿದ್ದರೋ ಇದನ್ನೆಲ್ಲ ರದ್ದು ಮಾಡಿ ಒತ್ತುವರಿಯಿಂದ ತೆರವುಗೊಳಿಸಿದರು. ಯಾವುದೇ ಬಲಾಢ್ಯರು ಇರಲಿ, ಅವರ ಒತ್ತಡಕ್ಕೆ ಮಣಿಯದೆಯೇ ಇಂಥ ಜಾಗಗಳಿಗೆಲ್ಲ ಕಂಪೌಂಡ್ ಮಾಡಿಸಿದ್ದರು.”

ನಿರೂಪಕರು: ನಾವೆಲ್ಲರೂ ಡಾ. ವಿಷ್ಣುವರ್ಧನ್ ಅವರ ‘ಹಲೋ ಡ್ಯಾಡಿ’ ಅನ್ನೋ ಸಿನಿಮಾ ನೋಡಿರುತ್ತೇವೆ. ಈ ಸಿನಿಮಾದಲ್ಲಿ ಐಎಎಸ್ ಅಧಿಕಾರಿಯಾಗಿ ವಿಷ್ಣುವರ್ಧನ್ ಭೂಗಳ್ಳರ ವಿರುದ್ಧ ಕಾದಾಡಿ ಸರ್ಕಾರಿ ಭೂಮಿಯನ್ನು ತೆರವುಗೊಳಿಸುತ್ತಾರೆ. ‘ಹಲೋ ಡ್ಯಾಡಿ’ ಸಿನಿಮಾದ ಸನ್ನಿವೇಶಗಳನ್ನು ಮೀರಿಸುವಂತೆ ನಿಜ ಜೀವನದಲ್ಲೂ ಜಿಲ್ಲಾಧಿಕಾರಿಯಾಗಿ ವಿ. ಶಂಕರ್ ಅವರು ಸಹ ಭೂಗಳ್ಳರಿಗೆ ಸಿಂಹಸ್ವಪ್ನವಾಗಿದ್ದರು. ಮಾಧ್ಯಮಗಳು ಶಂಕರ್ ಅವರಿಗೆ ‘Demolition DC’ ಅನ್ನೋ ಬಿರುದು ನೀಡಿದ್ಧರು. ಶಂಕರ್ ಅವರು ಜವಾಬ್ದಾರಿ ವಹಿಸಿಕೊಂಡ ಕೂಡಲೇ ನಿರೀಕ್ಷೆಗೂ ಮೀರಿ ಒತ್ತುವರಿ ಭೂಮಿಯನ್ನು ಸರ್ಕಾರದ ವಶಕ್ಕೆ ತೆಗೆದುಕೊಂಡರು. 11,000 ಎಕರೆ ಬದಲಿಗೆ 18,860 ಎಕರೆ ಭೂಮಿಯನ್ನು ತೆರವು ಮಾಡಿಸಿದ್ದರು.

2015 ರಲ್ಲಿ ಖುದ್ದು ಪ್ರಧಾನಿ ನರೇಂದ್ರ ಮೋದಿಯವರು ಶಂಕರ್ ಅವರ ಈ ಸಾಧನೆಯನ್ನು ಗುರುತಿಸಿ ಟ್ವೀಟ್ ಮಾಡಿ ಮೆಚ್ಚುಗೆ ವ್ಯಕ್ತಪಡಿಸಿದ್ದರು. ಶಂಕರ್ ಅವರ ರೀತಿಯಲ್ಲೇ ದೇಶದ ನಾನಾ ನಗರಗಳಲ್ಲಿ ಒತ್ತುವರಿ ಆಗಿರುವ ಸರ್ಕಾರಿ ಭೂಮಿಯನ್ನು ತೆರವುಗೊಳಿಸುವ ಕಾರ್ಯ ಆಗಬೇಕು ಅಂತಲೂ ಹೇಳಿದ್ದರು ಪ್ರಧಾನಿ ಮೋದಿ. 2014 ರಲ್ಲಿ ವಿಜಯ ಕರ್ನಾಟಕ ಕೊಡಮಾಡುವ ‘ವರ್ಷದ ವ್ಯಕ್ತಿ’ ಪ್ರಶಸ್ತಿಗೂ ವಿ. ಶಂಕರ್ ಭಾಜನರಾಗಿದ್ದರು. ವಿಪಕ್ಷ ನಾಯಕರಾಗಿ ಸಿದ್ದರಾಮಯ್ಯ ತಮ್ಮ ಟ್ವಿಟ್ಟರ್ ಖಾತೆಯಲ್ಲಿ ತಮ್ಮ 5 ವರ್ಷಗಳ ಅವಧಿಯಲ್ಲಿ ಬೆಂಗಳೂರು ನಗರದಲ್ಲಿ ಸುಮಾರು 18,860 ಎಕರೆ ಭೂಮಿಯನ್ನು ಭೂಗಳ್ಳರಿಂದ ತೆರವುಗೊಳಿಸಿದ್ದು ತಮ್ಮ ಅಂದಿನ ಸರ್ಕಾರದ ಸಾಧನೆ ಅಂತ ಬರೆದುಕೊಂಡಿದ್ದರು.